اُردو پوائنٹ “بلاگ ”

ان دنوں پورے ملک میں الیکشن کی تیاریاں زوروں پر ہیں اور ہر ایک امیدوار اپنے اپنے حلقے کے لوگوں کو سبزباغ دکھانے میں مصروف ہے لیکن جہاں بڑی پارٹیاں الیکشن مہم کو تیزی سے چلا رہی ہیں وہیں چندچھوٹی مگر حوصلہ مند پارٹیوں نے الیکشن سے بائیکاٹ کا اعلان کررکھا ہے مسلم لیگ کے نام پر قابض (ق )گروپ اور کراچی کی قسمت کو اپنے ہاتھوں سے لکھنے ،سنوارنے اور بگاڑنے والی محب وطن جماعت ایم کیو ایم دو ایسی جماعتیں ہیں جو اس یقین سے الیکشن لڑرہی ہیں کہ انہوں نے کامیابی حاصل کرنی ہے کیونکہ صدرصاحب نے اپنے مقاصدحاصل کرنے کے ساتھ ساتھ کچھ ایسے حالات پیدا کردیے ہیں کہ اگر کوئی ووٹ ڈالنے ہی نہ بھی جائے مگر یہ دوپارٹیاں بھاری اکثریت سے فتح یاب ہونگی۔اور ان دونوں جماعتوں کے منشور کی بھی کسی کو سمجھ نہیں آسکی کہ وہ کہنا کیا چاہ رہے ہیں۔کیونکہ پانچ سالہ دورحکومت میں ان دونوں پارٹیوں نے جتنے (معرکے)فتح کیے وہ ہم سب اچھی طرح جانتے ہیں۔ جبکہ پاکستان کی سب سے بڑی عوامی پارٹی پیپلزپارٹی نے عدلیہ کی (بحالی )کی بجائے عدلیہ کی”آزادی “کو نمایاں حروف میں اپنے منشور میں جگہ دی ہے اور پیپلزپارٹی وہ واحد جماعت ہے جسے سب سے زیادہ خطرہ ہے کہ الیکشن میں دھاندلی ہوگی اور وہ متوقع دھاندلی کی رٹ بھی لگارہی ہے اور الیکشن مہم کو بھی چلارہی ہے جس کی مجھے نہیں سمجھ آسکی کہ ان دونوں کاموں کو ایک ساتھ کرنے کے محرکات کیا ہیں لیکن یہ پاکستان ہے یہاں کوئی بڑاراز زیادہ دیر نہیں چھپایا جاسکتا ۔ دوسری جانب مسلم لیگ نواز گروپ پہلے الیکشن کے بائیکاٹ پرراضی تھا لیکن نجانے کیا سوجھنے کے بعد نواز شریف نے الیکشن میں حصہ لینے کا اعلان کرکے عمران خان اور قاضی حسین احمد کی پیٹ میں چھرا گھونپ دیا ہے جواس یقین کے ساتھ الیکشن کا بائیکاٹ کرچکے تھے کہ مسلم لیگ نواز ان کا بھر پور ساتھ دیگی لیکن نواز شریف نے یہ کہہ کہ اے پی ڈی ایم سے علیحدگی اختیار کرلی کہ ”ہم خالی میدان نہیں چھوڑنا چاہتے” نواز شریف صاحب آج بھی اس بات کا قائم ہیں کہ ان کی پارٹی کی سب سے بڑی اور اولین ترجیح چیف جسٹس افتخار محمد چوہدری سمیت اُن ساٹھ ججز کی بحالی ہے جنہیں صدر مشرف نے اپنے اقتدار کو طول دینے کیلئے ایمرجنسی اور پی سی او کی آڑمیں گھروں میں نظر بند کردیا ۔نواز شریف صاحب کہتے ہیں کہ وہ یہ معاملہ پارلیمنٹ میں جا کرحل کرینگے جبکہ عمران خان کا کہنا ہے کہ موجودہ حالات میں الیکشن لڑنا ہی ملک اور آئین سے غداری ہے کیونکہ صدرمشرف نے اپنے تمام مقاصد حاصل کرلیے ہیں اور اب وہ الیکشن کا ڈرامہ رچاکر اپنے غیر قانونی اقدامات کو آئینی تحفظ دینا چاہتے ہیں لہذا الیکشن کے بائیکاٹ کے سوا اور کوئی حل نہیں ہے۔سیاسی پارٹیوں نے تو عمران خان کا ساتھ دینے سے انکار کردیا ہے کیونکہ عمران خان عدلیہ کی آزادی چاہتے ہیں جبکہ ہمارے سیاستدان آزاد عدلیہ سے ڈرتے ہیں اوراسمبلی میں جانے کے خواہشمند ہیں اس لیے عمران خان عدلیہ کی بحالی کی تحریک میں تنہا رہ گئے ہیں مگر عوامی سطح پر لوگ عمران خان کی بھر پور تائید کررہے ہیں ۔اسی بائیکاٹ کے مسئلے پر ایم ایم اے انتشار کا شکار ہوگئی ہے اور مولانا فضل الرحمن نے پہلے تو قاضی صاحب کی جانب سے بائیکاٹ کرنے کے فیصلے کو غلط قرار دیکر الیکشن میں حصہ لینے کااعلان کیا اور بعد ازاں متحدہ مجلس عمل میں مارشل لا نافذ کرکے خود ایم ایم اے کی صدرات کی کرسی سنبھال لی ہے اور قاضی صاحب کو کھلے عام میدان میں اترنے کا چیلنج کردیاہے۔یہ وہ تمام صورت حال تھی جو اس وقت پاکستان میں قائم ہے ۔
حکومت کی حامی جماعتوں کا خیال ہے کہ الیکشن بالکل شفاف ہونگے جبکہ اپوزیشن پارٹیوں کا موقف ہے ملک میں ایمرجنسی نافذ کرنے کا ایک مقصد یہ بھی تھا کہ آنے والے انتخابات کیلئے اپنی مرضی کا الیکشن کمیشن ہو اور اعلیٰ عدالتوں کے ججز بھی اپنے ہوں تاکہ ”فتح کی راہ پر کوئی رکاوٹ پیش نہ آئے“پاکستان کا موجودہ سیاسی ڈھانچہ چار گروپوں میں تقسیم ہوچکا ہے مسلم لیگ ق والے اور ایم کیو ایم مسلسل دوسری بار لوٹ مار کرنے کیلئے، محترمہ بینظیر بھٹو وزارت اعظمیٰ تک رسائی کیلئے اور نواز شریف بطور احتجاجاً میدان خالی نہ چھوڑنے کا بہانہ بناکر الیکشن لڑرہے ہیں جبکہ چوتھا گروپ باغی گروپ ہے جس کی قیادت عمران خان کررہے ہیں جہاں وہ عوام کو بائیکاٹ کی تلقین کرنے میں مصروف عمل ہیں۔اب سوال یہ پیدا ہوتا ہے کہ پاکستان کااور پاکستانی عوام کا مخلص کون ہے ق لیگ والے جو دوبارہ پاکستان کو ترقی کی راہ پر چلانے کے خواہشمند ہیں؟ یا محض اقتدار کی خاطر ایوان میں جانے کی تمنا رکھنے والی پاکستان پیپلزپارٹی ؟جس کا منشور آج سے تین ماہ قبل محترمہ بینظیر بھٹو نے نیویارک میں پیش کیا تھا کہ اگر پی پی پی اقتدار میں آگئی تو امریکہ کی ڈاکٹر عبدالقدیرخان تک رسائی کوممکن بنائے گی اور لال مسجد اور جامعہ حفصہ کے کلچر کو بری طرح کچل دیا جائیگا ۔ تیسرا گروپ نواز شریف اور فضل الرحمن کا ہے جو وکٹ کے دونوں جانب کھیل رہاہے وہ عدلیہ کی بحالی اور دوسرے مسائل پارلیمنٹ میں جاکر حل کرنا چاہتے ہیں جو کہ میرے خیال میں قوم کے ساتھ سب سے بڑامذاق بھی یہی دو پارٹیاں کررہی ہیں کیونکہ مسلم لیگ ق اور پیپلزپارٹی محض اپنی ذات کیلئے جدوجہد کررہی ہے اور ان سے کسی بھلائی کی توقع رکھنا بھی بے وقوفی ہے مگر نواز شریف اور فضل الرحمن کا پارلیمنٹ میں جاکر مسائل حل کرنے کا پروگرام قو م کے ساتھ سب سے بڑا مذاق اور دھوکا ہے۔گزشتہ پانچ سالوں میں فضل الرحمن کی پارٹی اور مسلم لیگ ن ایوان میں موجود رہی لیکن یہ لوگ کچھ بھی نہ کرسکے …مشرف حکومت نے شمالی اور جنوبی وزیرستان میں اپنے ہی شہریوں پر امریکی افواج کے ساتھ ملکر بم گرائے یہ دونوں پارٹیاں ایوان میں تھیں لیکن کچھ نہ کرسکیں …
ملک میں مہنگائی نے غریب لوگوں کو سولی پر لٹکا دیا اور یہ سارے ایوان میں تھے مگرکچھ بھی کرنہ سکے …پاکستانی شہریوں کو بش کی خوشنودی کی خاطر امریکہ کے حوالے کیا جاتا رہا یہ لوگ ایوان میں تھے مگر کچھ نہ سکے…ملک میں چن چن کر علماء کو قتل کیا گیا… لال مسجد پر بم گرائے جارہے تھے …معصوم لڑکے لڑکیوں کو بے دردی سے قتل کیا جاتا رہا یہ ایوان میں تھے مگر کچھ نہ کرسکے …ملک میں مساجد اور مدارس پر بلڈوزر چلائے جاتے رہے لیکن یہ سبھی اسمبلی میں موجود تھے مگر کچھ نہ کرسکے …مشرف نے عدلیہ پر شب خون مارا ایک آزاد ملک کے چیف جسٹس کو جی ایچ کیو بلا کر ”اپنے ساتھ تعاون کرنے پر‘مجبور کرنے کی کوشش کی،انکار پر اسے گھر بھیج دیا گیا یہ تمام لوگ ایوان میں تھے مگر کچھ نہ کرسکے ۔یہ لوگ پانچ برس ایوان میں رہ کر وہ کچھ حاصل نہ کرسکے جو محض2ماہ میں وکلاء سول سوسائٹی اور صحافیوں نے ”سٹرک “پر کھڑے ہوکر حاصل کیا ۔انہیں تو ووٹ مانگتے ہوئے بھی شرم آنی چاہیے کہ وہ کس منہ سے ووٹ مانگنے آئے ہیں ؟ان سے تو ہزار درجے وہ چھوٹی پارٹیاں اچھی ہیں اور محب وطن کہلاونے کا مکمل حق رکھتی ہیں جو عدلیہ کی بحالی کیلئے الیکشن کا بائیکاٹ کرچکی ہیں اور عمران خان کاموقف بالکل درست ہے کہ موجودہ حالات میں جہاں ملک کے بہترین ،غریب کے ساتھی اور اللہ تعالیٰ کی ذات سے ڈرنے والے 60 ججوں کو گھروں پر نظر بندکردیا گیاہوایسے حالات میں الیکشن میں حصہ لینا اپنے مستقبل اور60 ججز کے ساتھ کے ساتھ ساتھ پاکستان کی سالمیت کے ساتھ غدرای کے مترادف ہے ۔گوکہ پاکستان اس وقت شدید بحران کا شکار ہے مگر موجودہ حالات پیدا ہونے سے ایک فائدہ پہنچا ہے کہ تمام سیاسی پارٹیوں اور ان کے لیڈران کی سوچ ان کی خواہشیں اورعزائم واضح طور پر سامنے آئے گئے ہیں کہ کون کیا چاہتا ہے۔
پاکستان اپنی تاریخ کے سنگین ترین دور سے گزر رہاہے اور اب نوبت یہاں تک آپہنچی ہے کہ وہ وقت بھی نہیں رہا کہ الیکشن کے موقع پر یہ کہا جاسکے کہ ”ملک کا مستقبل عوا م کے ہاتھ میں ہے کہ وہ جسے چاہے منتخب کرے “یہ الفاظ اس وقت ادا کیے جاتے ہیں جب ریاست میں قانون کی بالا دستی ہو اور عدالتیں آزاد ہوں ۔کاش ایسا دور دوبارہ لوٹ آئے ۔

بلاگ کا مستقل لنک | بلاگ کے تبصروں کی آر ایس ایس فیڈز